Nazioarteko II. Zero Zabor jardunaldiak burutuko dira larunbatean

Ostirala, 2011(e)ko apirila(r)en 01-(e)an 10:49etan

Bihar, larunbata, eta goizeko 10:30etan Alfonso del Val eta Joan Marc Simonek mahai-inguruan parte hartuko dute. II. Nazioarteko jardunaldietan errauste planten kontrolean (edo kontrolik ezean) eta errausketaren kontra mundu osoan zabalduta dagoen mugimenduaren ezagutzaz arituko dira bi adituak.

Alfonso del Val, madrildarra da, baina zehatz mehatz ezagutzen ditu Euskal Herrian hondakinekin bizi ditugun arazoak. Del Val, dena dela, ezaguna bada "El libro del Reciclaje" liburu klasikoaren egilea da eta, horrez gainera, 1970 eta 1980ko hamarkadetan, Iruñerrian hondakinen murrizte, berrerabiltze eta birziklatzeko antolatu ziren plan eta egituretan parte hartu zuten sustatzaileetakoa da. Gero, Gipuzkoako Diputazioak PIGRUG famatua onartu zuenean, Ezker Batuak eskatuta haren analisi zorrotza egin zuen: “Insisto, soy verde. Análisis crítico del Plan Integral de Gestión de Residuos Urbanos de Gipuzkoa 2002-2016 y propuesta alternativa ambientalmente más respetuosa”.

Gehiago irakurri...

Xabier Mikel atez ateko bigarren urteurrenaz

Osteguna, 2011(e)ko martxoa(r)en 24-(e)an 13:48etan

Xabier Mikel Errekondo, martxoaren 16an Hamaika Telebistan elkarrizketatu zuen Inaxio Esnaolak Atez Atekoak bi urte bete zituela profitatuz. Hara hemen, orduko elkarrizketa osorik.

Usurbilek %88,60ko portzentaia eman du gaikako bilketan 2010ean hondakinak atez ate kudeatuz

Ostirala, 2011(e)ko martxoa(r)en 18-(e)an 11:16etan

Gaur goizean, Ibon Goikoetxeak, Usurbilgo Udaleko ingurumen teknikariak, 2010eko Atez Ateko bilketaren datuak aurkeztu ditu. “Hiri hondakinen kudeaketan aitzindaria den herriak”, gaikako bilketan %88,60ko portzentaia  izan duela adierazi du. Iazko otsailaz geroztik, Usurbilek poligono industrial eta merkatalgune handietako (Urbil) hondakinak atez ate jasotzen ditu. Aurretiaz jasotzen ziren komertzio eta herri hondakinei lotzen zaie, horrela, poligonoetakoa, herriko hondakinei erantzun integral bat emanez.

2008an, Usurbilen, atez ateko hondakinen bilketa abiarazi aurretik, hondakinen %28,43 biltzen zen modu selektiboan. 2009ko martxoaren 16an, atez atekoarekin hasi ondotik, %82,33ko birziklatze mailara heldu zen urte hartako batezbestekoa. 2010ean, aldiz, azken datu hori gainditu egin da poligonoen barneratzearekin, hondakinen %88,60 selektiboki kudeatuz.

Hargatik, 2008an, 3.766 tona kudeatzetik, 2010ean, poligono eta merkatalgune handiak barne, 3510 tona kudeatzera igaro da Usurbilgo Udala. Goikoetxeak, kudeaketara industrigune eta merkatalguneak gehituta, “Usurbilek beste urrats bat eman” duela esan du, hiri hondakinen kudeaketa integral bat egiten duen lehen herria dela azpimarratuz.

Atez atekoak informazio gehiago, www.usurbil.net/atezate

Usurbil, Hernani eta Oiartzungo alkateek Carlos Ormazabal diputatuaren dimisioa eskatu dute

Ostirala, 2011(e)ko otsaila(r)en 25-(e)an 11:51etan

Usurbil, Hernani eta Oiartzungo alkateek Carlos Ormazabal Gipuzkoako Foru Aldundiko garapen iraunkorreko diputatuaren dimisioa eskatu dute gaur, Usurbilen egindako prentsa agerraldian. Hernaniko udaletik Marian Beitialarrangoitia alkateak, Oiartzundik Aitor Etxeberria alkateak eta Usurbildik Xabier Mikel Errekondo alkateakk, Lapatxen gabezia eta iruzurra hartu dituzte horretarako ardatz. Alkateen iritziz, Lapatxeko konpostatze plantak ezin dio aurre egin materia organikoa kudeatzeko eskariari, eta ondorioz, bildutako organikoaren %40 zabortegira botatzen ari dira. Etxeberriak aipatu duenez, hori horrela eginda, “herritarrak egiten ari diren esfortzuaren ia erdia zabortegira botatzen ari da Diputazioa. Eta gainera, Diputazioak, gezurretan, lotsarik gabe, konpostatzeko beste plantarik ez dela behareta ez dituela berak aurrikusitako beste konpostatzeko plantak egingo esan du”.

Errekondok hitza hartu duenean, “Diputazioa iruzur egiten” ari dela esan du: “iruzur egiten ari zaie organikoa biltzeko erronkari heldu dieten udal eta mankomunitateei eta baita herritarrei ere.” Errekondorentzat, eskandalua da Diputazioaren jarrera: “Gipuzkoako instituzio nagusiena birzikla daitekeen materiala, inolako begirunerik gabe, zabortegira botatzen ari da, hau tratatzeko gaitasunik ez duelako.” Usurbilgo alkatearen ustez, Diputazioak udalak eta berarekin herritarrak engainatu ditu “Gipuzkoarren erakunde nagusienaren lehentasuna birziklatzea zela zioenean”. Diputazioaren lehentasuna erraustegia egitea da Errekondoren iritziz eta baliabide guztiak Diputazioak horretara bideratu dituela uste du, birziklatzea albo batetara utzita.

Beitialarrangoitiak, Diputazioa udaloi eta zuzenean herritarrei egiten ari zaien iruzurragatik Garapen Iraunkorreko diputatu Carlos Ormazabalen dimisioa exijitu du hiru udalen izenean. Beste eskari bat ere egin du Hernaniko alkateak: 2010eko bilketaren emaitzak ikusita, Diputazioak atez ateko bilketa sustatzea. 2010ean Gipuzkoan bildutako organikoaren %71,5 atez ate bildu da. Horren arabera, Beitialarrangoitiak adierazi duenez, bosgarren edukiontzia “itxura egiteko baino ez du erabili Diputazioak” eta Carlos Ormazabalek egin duen bakarra, “atez ateko bilketa iraindu, desprestigiatu, oztopatu eta errauste planta toxikoa justifikatzea” besterik ez da.

Hiru alkateek, Diputazioari, “itxurakeria hutsa egiteko politika okerra zuzentzea” eta “Gipuzkoa garbi eta osasuntsuago bat eraikitzeko bidean instituzioen elkarlana oinarri izatea” eskatu dute.