San Markoseko zabortegia urriaren 13an itxi zuten ofizialki agintariek. Hala ere, kamioien joan-etorriek jarraitu egingo dute San Markosen dagoen transferentzia-plantan banatuko baita Gipuzkoako gainerako zabortegietara bideratuko diren hondakinak.
Horrela, hainbeste kexa eta arazoen iturri izan den zabortegia ixteagatik guztiak poztu arren, San Markoseko Mankomunitateko presidente Ricardo Ortegak gogorarazi zuen “hondakinen arazoa oraindik konpondu gabe dagoela”. Bere hitzetan, hiri hondakinen arazoari «errotik» heldu behar zaio eta horretan ari da San Markoseko Mankomunitatea Usurbilgo udalarekin batera.
Hondakinen arazoari irtenbidea emateko gaur egungo bilketa sistema aldatu eta hondakinen %80 birziklatzea lortu behar da. Horrela, ez litzateke ia zaborrik sortuko eta, beraz, ez litzateke ez zabortegi handi ezta errauste-plantarik ere beharko.
San Markoseko mankomunitateko gaur egungo arduradunek eta Usurbilgo udalak atez ateko bilketa-sistema bultzatuko dute beraien iritziz hori baita ingurumena eta osasuna hobekien zaintzeko konponbidea. Hori bai, esperientzia horren ostean, mankomunitateko gainerako udalerrietan ere atez ateko gaikako bilketa sustatuko dutela berretsi zuen Ricardo Ortegak.