Atez ateko bilketa sistemarekin, Usurbilen, errefusa astean behin soilik biltzen da, igandeetan.

Krisiaren eragina.
Urte hasieratik hondakinen kopurua, gutxika bada ere, jeisten hasi da.  Krisiaren eragina nabarmena da, kontsumoak behera egin du eta ondorioz, familiak nahiz merkatariak hondakin gutxiago sortzen ari dira. Urtarrilean %2ko jeitsiera izan da Usurbilen eta otsailean %12koa. Usurbilen bezalatsu, San Markoseko Mankomunitateko gainerako herrietan joera bera nabari da.

-%85 zabortegira.
Usurbilen atez ateko bilketa martxoaren bigarren hamabostaldian hasi da, eta dagoeneko nabarmena da bilketaren arrakasta. Hilaren 16tik 31 bitartean hondakinak sailkatuta, 56.000 kilo zabor gutxiago bota dira zabortegira, oro har, %35 gutxiago. Baina bilketaren arrakastaren neurria ikusteko lehen hilabete osoa izan da apirilekoa, eta emaitzak ezin hobeak izan dira: 2008ko apirilean 173.200 kilo eraman ziren zabortegira, eta 2009ko apirilean, berriz, 25.380 kilo. Hau da, aurtengo apirilean iazkoan baino 148.000 kilo zabor gutxiago bota da zabortegira, %85,35 gutxiago, alegia.

Errefusaren nolakotasuna.
Zabortegira eramandako 25.000 kilo errefusa horiek “garbiak” dira, hau da, ez dute ia materia organikorik beren baitan. Beraz, zabortegira botata ez dute kiratsik eragingo, ez lixibiaturik isuriko, ez dute lur azpiko urik kutsatuko. Berotegi efektua eragiten duen  metano gasik ere ez da sortuko.

Datu ofizialak.
Datu hauek San Markoseko Mankomunitateak 2009ko apirilean zehar tranferentzia estazioan hartutako pisuen emaitza ofizialak dira.Transferentzia estazio hau FCCk kudeatzen du.